ԱՐՑԱԽՈՒՄ ՆԱԽԱԳԱՀԱԿԱՆ ԸՆՏՐՈՒԹՅՈՒՆՆԵՐԸ ԿԿԱՅԱՆԱՆ ՀՈՒԼԻՍԻ 19-ԻՆ

Նախագահական ընտրությունները Լեռնային Ղարաբաղի հանրապետությունում կայանալու են 2012 թ. հուլիսի 19-ին։ Որոշումը կայացվել է մարտի 29-ին Ղարաբաղի խորհրդարանի  լիագումար նիստում։

Նախորդ նախագահական ընտրությունները Ղարաբաղում կայացել են 2007 թ. հուլիսի 19-ին։ Դրանց արդյունքում նախագահ էր դարձել Բակո Սահակյանը։

ՍՏԵՓԱՆԱԿԵՐՏՈՒՄ ԿԱՆՑԿԱՑՎԻ ԱՆՆԱԽԱԴԵՊ ԶԻՆՎՈՐԱԿԱՆ ՇՔԵՐԹ

Լեռնային Ղարաբաղի հանրապետության մայրաքաղաք Ստեփանակերտում մայիսի 9-ին զինվորական շքերթ կանցկացվի՝ նվիրված Շուշիի ազատագրմանը և ԼՂՀ պաշտպանության բանակի կազմավորման 20-ամյակին։

Զինվորական շքերթին կմասնակցեն հետևակի, զրահատանկային զորքերի, հակաօդային պաշտպանության, հրետանային ստորաբաժանումները։ Շքերթն իր մասշտաբներով և հանդիսավորությամբ խոստանում է աննախադեպ լինել։

ԱՐՑԱԽ ԱՅՑԵԼՈՂ ԶԲՈՍԱՇՐՋԻԿՆԵՐԻ ԹԻՎՆ ԱՃԵԼ Է

2011 թ. ԼՂՀ այցելել են 11362 օտարերկրյա քաղաքացիներ, որն ավելի քան 3 հազարով գերազանցում է 2010 թ. ցուցանիշները։ Զբոսաշրջիկների աշխարհագրությունը չափազանց լայն է և տարեցտարի ավելի է ընդլայնվում։ 2011 թ. ԼՂՀ այցելել են ՌԴ-ի, ԱՄՆ, Ֆրանսիայի, Իրանի, Կանադայի, Գերմանիայի, Ուկրաինայի, Մալայզիայի, Բանգլադեշի, Կամբոջայի, Գաբոնի, Քենիայի, Կոտ-դ’Իվուարի, ՀԱՀ-ի, Կուբայի, Սինգապուրի, Չինաստանի, Ինդոնեզիայի և այլ երկրների քաղաքացիներ։ 

Արցախի նկատմամբ օտարերկրացիների մշտապես աճող հետաքրքրության մասին վկայում է նաև այն փաստը, որ երկրամասը ավելի հաճախ է ընդգրկվում աշխարհի ամենագրավիչ զբոսաշրջային երկրների վարկանիշում։ Ժամանելով Արցախ, հյուրերը հաճախ այցելում են Գանձասարի (XIII դար), Ամարասի (IV դար), Դադիվանքի (IV դար) վանական համալիրներ, հինավուրց Տիգրանակերտ քաղաքի պեղումների գոտի (մ.թ.ա. I դար), հնագույն Ազոխի քարանձավ, հայկական հինավուրց ամրոցներ և այլն։ Զբոսաշրջիկներին գրավում են ոչ միայն պատմական հուշարձանները, կուսական բնությունը, առողջ միջավայրը, այլև արցախցիների սիրալիրությունը, բարյացակամությունը և հյուրընկալությունը, ինքնատիպ ղարաբաղյան խոհանոցը։