Արցախի Հանրապետության նախագահ Բակո Սահակյանը մայիսի 20-ին, այցելել է Ասկերանի շրջանի Պատարա գյուղ եւ այնտեղ մասնակցել Արցախյան ազատամարտում զոհված պատարացիների հուշարձանի բացման հանդիսավոր արարողությանը: Նա կարեւորել է հայրենիքի ազատության ու անկախության համար նահատակված հերոսների հիշատակը հավերժացնող նման կոթողի կառուցումը եւ երախտագիտություն հայտնել բոլոր նրանց, ում ջանքերով իրականացվել է այդ ազգանպաստ նախաձեռնությունը:
Բակո Սահակյանը նշել է, որ Պատարա գյուղի բնակիչներն անձնվիրաբար մարտնչել են Արցախի բոլոր ճակատներում, իրենց դրսեւորել որպես խիզախ ու քաջարի մարտիկներ եւ այսօր էլ ծառայում են Պաշտպանության բանակի շարքերում: Նա վստահություն է հայտնել, որ գյուղի բնակիչները նման եռանդով կշարունակեն ապրել եւ աշխատել` ի փառս մեր պետության ու ժողովրդի:
Նախագահը պետական պարգեւներ եւ արժեքավոր նվերներ է հանձնել մի խումբ ազատամարտիկների: Միջոցառումանը մասնակցում էին Հայ Առաքելական Եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, Ազգային ժողովի նախագահ Աշոտ Ղուլյանը, պաշտոնատար այլ անձինք:
ՆՈՐ ԷՋ։ Արցախյան ազատամարտում զոհված մարտիկների հիշատակին հուշարձաններ կան Արցախի գրեթե բոլոր մեծ ու փոքր գյուղերում, շրջկենտրոններում։ Ցավոք առայսօր, ադրբեջանա-ղարաբաղյան պատերազմից շուրջ 20 տարի հետո մայրաքաղաք Ստեփանակերտում չկա Ազատամարտում նահատակված ստեփանակերտցիների հիշատակը հավերժացնող մի հուշարձան։ Ցավալի է շատ։
| 
