Մինսկի խմբի համանախագահները դեկտեմբերի 16-ին Բաքվից ժամանում են Երեւան: Նրանք հանդիպում են ունենալու արտգործնախարար Էդվարդ Նալբանդյանի հետ: Համանախագահների այդ այցի մասին խոսվում էր դեռեւս նոյեմբերի վերջին Վիեննայում կազմակերպված Սարգսյան-Ալիեւ նախագահական հանդիպումից հետո: Հանդիպումից հետո հայտարարվեց, որ դեկտեմբերին համանախագահները կրկին կգան տարածաշրջան, որպեսզի նաեւ աշխատեն հաջորդ տարվա սկզբին նախագահական մակարդակով եւս մի հանդիպում կազմակերպելու ուղղությամբ:

Վիեննայում տեղի ունեցած հանդիպումից հետո տեղի են ունեցել հատկանշական իրադարձություններ: Մոսկվայում տեղի ունեցավ Էրդողան-Պուտին հանդիպում, որի ընթացքում Թուրքիայի վարչապետը հայտարարեց Եվրասիական միության հետ Ազատ առեւտրի համաձայնագիր կնքելու ցանկության մասին, նաեւ ասաց, թե ռուս-թուրքական հարաբերությունը ներկայում կառաջացնի շատերի նախանձը: Պուտինն էլ հայտարարեց Թուրքիայում ատոմակայանի կառուցման 20 միլիարդ դոլարի ծրագրի մասին:

Հետո Պուտինը ժամանեց Հայաստան՝ մի քանի ժամով, առաջինը սակայն ոտք դնելով Հայաստանում ռուսական 102-րդ ռազմակայան եւ այդպիսով ցույց տալով, որ Հայաստանը դիտարկում է որպես ընդամենը ուժային հենարան Ռուսաստանի համար: Պուտինի այցի ընթացքում պարզվեց, որ Հայաստանը 300 միլիոն պարտք ունի Ռուսաստանին, որի դիմաց Մոսկվան ստացավ հերթական գույքը՝ Հայռուսգազարդի հայկական վերջին բաժնեմասը:

Պուտինի այցից հետո շատ կարեւոր հայտարարություն արեց Իրանը: Իրանը Հայաստանում իր դեսպան Մոհամմադ Ռեյիսիի շուրթերով հայտարարեց, որ Երեւանի ցանկության դեպքում Թեհրանը կարող է էժան գազ վաճառել Հայաստանին՝ ռուսականից էժան:

Դրանից հետո Իրան մեկնեց ՌԴ արտգործնախարար Լավրովը, իսկ Երեւան եկավ Թուրքիայի արտգործնախարար Դավութօղլուն, մասնակցելու Երեւանում տեղի ունենալիք սեւծովյան տնտեսական գործակցության կազմակերպության հավաքին: Դավութօղլուն հերքեց իր այցից առաջ թուրքական մամուլի տարածած տեղեկությունը, թե Անկարան Հայաստանին առաջարկում է երկու շրջան հանձնել Ադրբեջանին, որի դիմաց կբացվի հայ-թուրքական սահմանը: Մյուս կողմից զարմանալի կլիներ, եթե Թուրքիայի արտգործնախարարը հրապարակավ խոստովաներ, թե այդպիսի բան առաջարկում են: Փոխարենը Դավութօղլուն հայտարարեց Կովկասի Թուրքիայի տեսլականը Երեւանին ներկայացրած լինելու մասին: Իսկ այդ տեսլականում, ինչպես հայտնի է, Ղարաբաղի հարցն ու հայ-թուրքական սահմանը շաղկապվում են: Երեւանն իհարկե պնդեց դրանք չշաղկապելու իր դիրքորոշումը:

Դավութօղլուի երեւանյան այցի նախօրեին Հայաստանում էին Հարավային Կովկասի երեք հանրապետություններում ԱՄՆ դեսպաններն ու ԱՄՆ պետքարտուղարի տեղակալի օգնական Էրիկ Ռուբինը: Նրանք Հայաստանում խորհրդակցություն էին անցկացրել միմյանց հետ ու նաեւ հանդիպել Հայաստանի ԱԳՆ ղեկավարին:

Այդպիսով, Վիեննայից հետո տարածաշրջանն ապրել է դիվանագիտական բավական բուռն կյանքով եւ եղել են նույնիսկ ոչ սովորական, գրեթե սենսացիոն հայտարարություններ: Օրինակ, գազի մասով Իրանի դեսպանի հայտարարությունը: Այստեղ հարցը միայն տնտեսությունը չէ: Իրանի առաջարկը հստակ քաղաքական առաջարկ է, որը կարող է էապես փոխել տարածաշրջանի աշխարհաքաղաքական պատկերը:

Մինսկի խմբի համանախագահների տարածաշրջանային այցը տեղի է ունենում այդ բուռն ֆոնին: Հատկանշական է նաեւ, որ նրանց տարածաշրջանային այցի ընթացքում արձանագրվում է շփման գծի հերթական ողբերգությունը՝ ադրբեջանական դիպուկահարը սպանում է հայ զինվորին: Արցախի հարցի բանակցային գործընթացում այդ սահմանային միջադեպերը կարծես թե դարձել են անբաժան ուղեկիցներ, եւ բանակցության հանգրվանները զերծ չեն մնում սահմանային ողբերգություններից: